Oarsoaldeko Hitza

Pasa den asteburuan Allerru Judo Taldeko Haurren Mailako judokek emaitza ezin hobeak lortu zituzten Gasteizko San Viator Txapelketan.
Amaguadalupekoa Hondarribiako taldearekin batera hartu zuten parte Allerru Judo Taldekoek, eta 550 judoken artean urrezko 15 domina, zilarrezko 10 eta brontzezko sei lortu zituzten. Allerru Judo Taldeko arduradunen esanetan, judo teknikoa erabili zutelako irabazi zituzten borrokaldi gehienak.
Horrez gain, Allerru Judo Taldeko arduradunek zehaztu dute judokak aurkeztu ziren kategoria guztietan lortu zutela dominaren bat. «Hala ere, aipamen berezia egin behar zaio Jokin Galarragak lortutako zilarrezko dominari, izan ere, dituen ezintasunak alde batera utzita, hiru borrokaldi egin baitzituen eta horietatik bi irabazi bigarren postuan geldituz», nabarmendu dute Allerru judo Taldeko arduradunek.
Alebin Mailako lehia, Hernanin
Igandean, berriz, Hernaniko kiroldegian Allerru Judo Taldeko Alebinen Mailako judoken txanda izan zen, eta han ere emaitza onak lortu zituzten.
165 judoken artean, urrezko bi domina, zilarrezko bat eta brontzezko bat lortu zituzten: Peio Galarragak 52 kilotik beherako mailan brontzezko domina lortu zuen; Xabier Cazorlak 57 kilotik beherako kategorian urrea; Ametsek 52 kilotik beherakoan lehen postua eta 52 kilotik gorako mailan Enara Sagarzazuk bigarren egin zuen.
Hein berean, Allerru Judo Taldeko arduradunek gogorarazi dute Maialen de La Coz eta Jon Gainza judokek ere parte hartu zutela.