Oarsoaldeko Hitza

Mendekoste jaietako larunbat gauak, herritarren poztasuna ilundu zuen. Igandeko 4:00ak inguruan, Pasai Donibanerako bidean 21 urteko M. M. A. atxilotu zuen Ertzaintzak Sahatsa taberna inguruan bi pertsona arma zuriz erasotzea egotzita.
Gertakaria Sahatsa tabernan bertan hasi zela adierazi zioten lekuekoek Ertzaintzari eta prentsa ohar bidez hala eman du jakitera. Ertzaintzaren arabera, taberna barruan zegoen neska batek M. M. A-ri egotzi zion ipurdia ukitu izana. Une horretan erasotzaileak bultza egin zion neskari eta lurrera erori zen. Egoera ikusita neska laguntzera joan ziren bere lagunak, eta une hura aprobetxatu zuen erasotzaileak tabernatik ateratzeko. Erasotzailea tabernatik irteten ari zela ikusita neskaren bi lagun atzetik irten ziren, eta M. M. Ak bi edalontzi jaurti zizkien Ertzaintzari adierazitakoaren arabera.
Borrokaldian zauritu zituen
Egoera okertzen joan zen eta borrokan hasi ziren hirurak. Borrokaldian, erasotzaileak arma zuria atera eta zauriak eragin zizkien buruan, besotan, belarrietan eta bizkarrean. Zaurituak Donostia ospitalera eraman zituzten anbulantzian. Une horretan Ertzaintzari deitu zioten lekukoek eta haien adierazpenak jaso ostean, erasotzailearen bila irten ziren.
Ertzaintzaren esanetan Pasai Donibaneko bidean ikusi zuten erasotzailea, eta honek patruila ikusi orduko, ustez, ihes egiteari ekin zion. Dena den, harrapatzea lortu eta giza hilketa saiakera leporatuta atxilotu zuten.
M. M. A-k aurretiaz Lezon zauritutako bi pertsonekin izandako borrokaldiaren ondorioz, sudurretik odol jarioa zuen eta Errenteria-Oreretako anbulatoriora eraman zuten, eta ondoren Ertzainetxera.
Arma topatu dute
Igande goizaldean, herriko garbitzaileek arma zuria aurkitu zuten gertakaria jazotako lekutik gertu: metxero bati lotutako ebakitzeko hortz bat zen arma zuria.
Ertzaintzak adierazi duenez, erasotzailea gaur pasatu da epailearen aurretik. Giza hilketa saiakera egotzita atxilotu zuten; epailearen aurretik igaro ostean, ordea, aske gelditu da.